خالد قيرمان -
غبني غبن لمَنْ جرى له عناء.. لقيته في قسم إعادة التأهيل النفسي والرعاية الأسرية بمؤسسة التنمية والإرشاد الأسري..
قلت؛ أوووه صديقي وزميلي العزيز أينك.. لي منك من أيام الجامعة وما أجي ألقاك إلا هانا؟.. أو قدك مجنون هههه..
قال؛ والله ما عاد للجنان إلا شويه.. كيف حالك؟
أنا بين أتابعك في الفيس وأنت ما جابك؟.
قلت؛ معي مراجعة دورية لمريض..
قال؛ نفس الشيء الذي جابك جابني، حرام إن قد بعت ما فوقي وما تحتي على ابني الله يشفيه ويعافيه..
قلت خير ماله؟
قال؛ سايرله شوية خُبرة من حق هذ الأيام وزيد القات والشقارة والسهر وجلسة بلا عمل وأنا بين أهده من صَلَيا وأنعثه كلام، وأمه بتهده من صَلَيها أو يعقل ويبطل الولعة ويرحمنا من مصاريفه وشكاوي الناس الذي يغاويهم والذي ينصب عليهم والذي يتسلف منهم ويهرب يدحي، المهم ما درينا يوم إلا وقد بيهذي ويحاكي نفسه ويبكي ويضحك بدون سبب.. قمنا شليناه عندالرحلا مشايخ قالوا العافية بعدهم واحدة بواحدة..
وصلنا لا عندهم قالوا؛ يا باطلاه ابنكم مخاوي لريحان..
قلت لهم كيف؟، قالوا ريحان شاب من الجن صادف طباعه من طباع ابنكم قام احتواه دخل فيه وخاواه واتعاهدوا فيما بينهم ما حد يترك الثاني وعليه العار من فلت رفيقه..
قلنا لهم؛ وذلحين ما يقع ماهو الحل؟
قالوا؛ المذكور يحتاج جلسات قرآن ويشرب ويغسول بماء مقري ويدهون بزيت مخصوص وبعده بعده لوما ينطق الجني وبعدا نخيّره يا يخرج من ابنكم بالحلا يا نمكنه ضرب لوما نخرّجه بالغصب..
قلت أيوه وبعدا خرج عق والديه أو ماشي ؟
قال؛ ذكَّـرتني قالوا؛ الجني كان قد هرب من أهله..
قلت؛ يو والقصة وبعدين لين وصلتوا اقطب؟..
قال؛ مكَّـنونا جلسة بعد جلسة وهم بيهرعوا لنا الولد ضرب خنق وركل وذرع وربط، ما تكمل الجلسة إلا وقد عتطلع روحه ويطمنونا إن قد الجني بيترخشش بس عاده معاند ما يشتيش يتحاكى قصده إن ما احناش داريين إنه بيتوجع ما يضترب ضرب لكن أين عيسير مننا ومعانا كتاب الله وسنة رسوله عنمكنه رقية بعد رقية وخبط وخنق لوما يخرج بإذن الله..
ولو جلس يعاند با نتواصل مع أبوه، أبوه جني من الأخيار يخلق من العود عودين، له مدة وهو بيدوره..
قلت كيف بيدوره وهو جني؟.. يعني الشيخ لقيه قبل أبوه؟..
قال؛ والله إني سألتهم نفس السؤال قالوا؛ نعم وهذا بفضل الله وآياته التي تُخضِع كل مارد عتيد..
قلت المهم خرجت لا نتيجة؟.. قال؛ ولاشيء ستة أشهر وكل أسبوعين جلسة يحمموه وينشفوه ويشّربوه ويدهونوه ويربطوه وتبدأ الطقوس بقراءة آيات من القرآن ويصيح الشيخ قائلاً؛ اخرج اخرج يا كافر؟.. اخرج حلَّفتك بالله تخرج اخرج.. ويزقم بحلول ابني ويخنقه خنقة بنت كلب لوما يجحضين عيونه ويزرق وجهه وما يفلت يده إلا وقد تغيَّر صوته وبدأ يجابر والشيخ يبسر صَلَيا وصَلا أمه ويقول هيا شفتوا هو هذا الجني المتلبّس في ابنكم ويمكّـنه ذررع بالخيزرانة من رأسه لا أرجله والوليد مربوط واحنا شابحين له وقد جسمه حوارق وبيتغسل عرق وأنا وأمه بنبكي ونتراشى الشيخ ومعاونه يرحموه خلاص عيموت أنا أعنيكم والشيخ يقولي هذا الذي بنطيبه ذرع مشو ابنكم هو الجني..
ابنكم بيتفرج ويقولي زيد.. اندعوا زيد اندعوه يرحله مني أتخارج..
وقبل ما يكمل القصة جاء دوري ادخل بمريضي غرفة الجلسات النفسية قمت أديت له رقمي على وعد نتواصل..
عملنا الجلسة المنتظمة حسب الكرت وراجعنا الطبيب وأخذنا العلاج لكل ثلاثة أشهر وكل ذلك بالمجان..
والشكر كل الشكر لهذه المؤسسة وأطبائها وكل العاملين فيها.